Melkkutscher

De Meieree wöör to de Tiet an de Bahnhoffstraat in Snevern, wo hüüte en Edeka-Markt ansiedelt is. Se is Anfang de 1920er Johren vun de Genossen boet un 1971 verköfft un afreten worrn. Morgens, teemlich fröh, füngen de Touren an. Aflegene Hööv müssen de Kannen na en Sammelpunkt bringen. Föhrt würr bi jedet Weer. In Winter, wenn de Wind de Weeg mit Snee toweiht harr, kööm dat ok mal vör, dat dat Spann vun de Fohrbahn afkööm. De Straten weern woll plaastert, aver teemlich small. Up en Siet en Radfohrstieg, up de annern Siet en „Sommerweg“, dat heet en Sandweg, de gern vun Peerspanne mit Ackerwagen beföhrt würr, männichmal in stövigen Sand un männichmal in Matsch. De Peerspanne würrn na un na dörch Trecker mit Plattformwagen verdrängt.

De Melkkannentahl wöör je na Öörd un Streken ünnerscheedlich. Ok de Johrestied speel ne Rull. En Kann mit Melk wöög gode 25 Kilogramm. De Fohrer müss se in de Meieree utkippen. In de letzten Johren kömen de Kannen up Transportbänn un dat Utgeten övernöhmen de Meiereemitarbeider. Up‘n Torüchweg wöörn de Kannen to‘n Deel mit Mager- un Bottermelk füllt, je na Opdrag vun de Melkbuern.

De Melk na de Meieree bringen, wöör en Deel vun jemehrn Opdrag. Bevör de Torüchweg na de Dörper losgüng, müssen de Melkkutscher noch faken en poor annere Deensten för jemehr Dörpslüüd kloor kriegen. Se müssen Höhnerfoder, Kohschroot, Mahlworen usw. bi de jeweiligen Hannelsfirmen un Genossenschaften laden. In en Koophuus – Georg Kolthammer, dat „KaDeWe“ von Snevern – nöhmen se Nagel, Stickeldraht un lieke Woren mit. Et schall ok vörkamen ween, dat de Fronslüüd ut de Dörper Tapeten, Stoffen, Schoh, Medikamenten un Strümpböxen ordert hebbt. De Fohrer ut Lünzen transporter över Johre sogor mehrmals in‘ne Week Borgeller för de Geschäftsstell vun de Spoorkass an sienen Oort. De „Opdrääg“ fünnen de Kutscher dörch en Zedel morgens ane Melkkann. De „Mitbringsel“ würrn extra betahlt un wöörn en angenehmet Tobroot. Vun Häbe, to‘n Bispeel, würrn ok Lüüd mitnahmen. De Togmaschien wöör‘n ümbooten Bus, de Melkkannen stünnen up‘n Anhänger.