Affluken up allen Vieren

Doumals so in dei 1950iger und 1960iger Johre, dor war dei Landwirtschaft noch so ganz anners as vandaag. Dor gäiv datt lütsche Flächen mit Runkeln und Steckröiben. Dei wüdden in dicke Regen drillt und keimen denn ock doppelt unddreifach ansetten. Und denn ging datt los mit dei Handarbeit.

Touerste hacken, jümmer twee Hackenschläge und denn dei Planten stehn laten. Dor stünn denn aver meist nich bloss eine Plante sondern twee oder mehr. So eenzeln drillen, datt geif datt damoals noch nich.

Dei nächste Arbeitsgang wör denn datt affluken (vereinzeln). Dor kreip man up allen Vieren. Dei Groten nöimen dree Regen up einmal und wi Kinner een oder twee je na Öller. Jümmer schön eine Plante stihnlaten. Manchmol reit man dei ut verseihn ock mit ut und hätt se denn wedder inbuddelt.

In Huse blieben wör nich. Schaularbeiten könn man abends ock noch moken, inne Melketied. Datt Beste an so´n Namidag wör dei Kaffeepause. Irgendwo innen Schatten ünnern Boom. Meist hülpen noch Nachborn oder Lüe utten Dörpe.

Denn gäiv datt Pottkoken up Brot oder frischen Stuten, und för us Kinner leckern sülmgemakten Saft. Denn würd vertellt, watt datt so Neies in Dörpe geif. Wer mit wän uns so. Wer krank wör und wer dotbläben. Wer heiraten woll, und wer ein Kind kräig.

Datt wör better as WhatsApp und Co. Na´n Kaffee ging datt noch ´ne Runde füdder, bätt toue Melketied. Un wenn man denn dorna an Lanne vörbi föite, denn wüsste man noch genau welke Rege wer mokt har. Datt was Superbio, datt kann ick jou vertellen. Ob ick datt wirklich noch mol wedder häbben möss, datt bezweifl ick. Aver dei Erinnerung doranne, dei blivt . Und datt Wort AFFLUCKEN, datt gift datt bestimmt irgendwann nich mehr.