De „Raketenversuche“

Wei mösten ober uk oft midde non Felle, ik als teinjähriger Junge mößte bei üsch un den Novers Ossen uder Perd an ´n Kopp packen bein durplagen uder Kartuffeln anmülln, uder Rummel un Kurn, hacken, hinre de Samascheine, keiken op alle Schare lupet un huch un dal moken. Et fehle an Arbeitskräften, denn de Mannsluie wärn noch in Gefangenschaft, uder kammen gor nicht mir.

Obens kloke Achte bet margens klocke Sesse was Sperrstunne, et dröfte kaner up de Strote. Mir wie drei Luie dröften nicht tehupe stahn, „Versammlungsvarbut“! Un noch alles mügliche was varbun. Tean spielen was immer noch Teid, wei Kinners hearrn domlos woll den gröddesten Spielplatz, den et heier inner Gigend je e giem hat. In´n Leiewinkel un up de Akenstie was 1942 dat Tarnwerk ebiut. Irste Teid von duitschen Soldoden bewachet, dröften wei do nicht rin, no en Kreige heat de Amerikaner up epasset, ober dai wern nich sea genau. Wat do an Material was, sea wat ken´n wei gornich, diusende von Glühbiern de mirsten warn kaputt espetten un wecke midde no Hius enum, un Bleiplatten zentnerswor, tean Bleisoldoden geiten.

Ober dat beste fur üsch Jungens wern de Pulwerstangen. Wenn man de anen Enne anbot hat un se bren´n dien, möste man se an´n anren Enne iuttrampen, denn explodeiern se. In´n ganzen Usterfelle, ballere un dampe et un nommedogs gung et in´n Darpe weier. De ulen Luie heat eschulln un wolln de Militärpolizei beischaid seggen, ober de Amerikaners heat nisst emoket, dei ken´n dat Ballren woll iut en Wilden-Westen.