Mit Afstand tosamenholln

Aber well haev dormit räket, dat düssen frömden Virus us so gau inne Kneeie zwingen künn! Alles wat noch so wichtig was, bit vör kottem un usen Alldag bestimmt haev, is nu utschaltet. De ganze Wäkenstruktur is up eenmaol hin: Den Choraobend, de Schwimmgymnastik, den Handarbeitsaobend, dat Freustücken mit den Fröndinnen, de Kortenaobend…

De Kinner brukt nich mehr nao de Schaule, Kita, Musikschaule unsowider… De Lüttken nämt di nu de Wohnstaowqe uttenanner, wall se ja nu nich maol nao den Spölplatz düürt. Dat Fernsehen löpp heeit; et haev sück all drup instellt, dat de Lüe nu den heelen Dag in Hus bünt: Dor is ok de veerte Wiederholung noch willkommen. Hauptsache man krieg den Dag krumm. Sogor Football is ers maol instampt. Ohne Football – geiht dat öwerhaupt? Watt nu nich alles geiht!

Un dann kump bi de Mensken ok noch de urolle Angst hoch, dat se öwer kott oder lang verschmachten mööt. Se plündert den Supermarkt. In Italien deckt se sück mit Wien in, in Holland stürmt se den Coffieshop. Un in Dütschland? Dor kloppt man sück üm Klopapier! Kann man dor eigentlich ok satt van werden? Notgedrungen weerd wi nu aale tau Hygieneexperten un leert nu, wo man sück richtig de Hanne waschket un wovull Abstand man nu tau hollen haev, üm sück nich antausticken. Bi de Hektik, de wi so gewohnt bünt – wi hannen ja noit Tiet – leer wi nu in Hus tau blieben, eenfach bloß in Hus blieben! Dat fallt us schwor.