Gefängnis oder Altenheim?

Dör de Corona-Pandemie geiht alles langsom bargdol, bloß de Infatschon stigt hoch. Dat Geld ward knapp, de Regeerung mutt sporen, un wi schnallt use Gürtel enger. Aver noch een grootet Problem belastet use Gesellschap: De Pflege in Krankenhüser un besonners in Altenheimen. Dor fehlt Kräfte, un nich bloß in Corona-Tieden, nää, all lange Tiet vörher. De Politik hett jümmer versproken, bätere Löhne un minschenwürdige Arbeitstieden to gewährleisten, aver nix hett sik do`n! Folge: Väle Pflerger/innen wannert af, un mokt gans wat anneret.

Dat givt eenen bruukboren Vörschlag: Wi schöll`n use Senioren in Gefängnisse stäken! Dat bringt jem bloß Vördeele. Se kriegt däglich een Duschbad. Dor givt dat Video-Öberwachung, falls jem wat passeert. Se kriegt dree Mohltieten annen Dag, Totritt in de Bökeree, künnt Computer nutzen, in`t Fitnesstudio goh`n, hebbt den Dokter vör Ort un köstenlose Medizin. Wat mokt man denn mit Kriminellen? Gans enfach, man stikt se in de Altenheime! Dor kriegt se karge Mohltieten, för Upmarksomkeit un Schnakeree hett man dor keene Tiet. Schloptiet jümmerto af Klocke säben, egol, ob dat Sömmer udder Winter is. Uterdem bloß eenmol duschen inne Wäke un lüttje Zimmer, in de se mit sik alleen de meiste Tiet tobringen möt. Aver dorför möten se monotlich 3500 Euro Miete betohlen.

Dat is doch würklich beschämend un trorig, dat in Dütschland Kriminelle bäter behannelt weerd as ole Minschen, de ehrt Läben lang arbeit` un Stüern betohlt hebbt! Een Minsch, de 45 Johre arbeitet un Stüern betohlt hett, hett in Dütschland de allerbesten Chancen, sienen Läbensavend in Armut to verbringen. Aver Ensomkeit, sik unerwünscht un lästig to föhlen, is de schlimmste Armut öberhaupt. De Rente is gor keene Leistung vonnen Stoot, sonnern man kricht sien egenet Geld mit väl to väl Afzügen torücht.