Wie de Melk to‘d Molkeree bracht weer

Dat hebbt Scheepers achtuntwintig Johr mit dat Russenpeergespann un söbenteihn Johr mit den lüttjen Deutz-Trecker mokt.

Ganze fiefunveerdig Johr, daginn – dagut, hebt dat Schepers Opa, Vadder un Dochter mokt, in‘n Krieg hebt se enen Hülpsmann, den Franzosen Joel, hat.

Na den Niebau von de Molkeree Negenteihnhunnertsöbenuntwindig (1927) köm de Uplaag för de Melkkeihbuern, Melkkannenbänke hertaustellen.

För den Melkföhrmann wör dat eene grode Erlichterung, nu bruk he de vullen Melkkannen nich mehr so hoch to böhren.

Wörn mal nich alle Melkkannen to half söben upp de Bank, denn fleitschte de Melkföhrmann ganz luur mit twee Fingers in‘n Mund. Von de utdörpsche Hoffsteer - de Brüggenrose - dusend Meder weg, wör de Melk mit‘n Hund vör ne Gummikoor herbrocht.

Middags bröch en Schöler ut‘n Dörp de trüchgeleeberte Magermelk wedder mit den Hund vör ne Koor na Rosens hin.

Wenn Scheepers Vadder in Grooden Heins de Melk tosamen har, föhr he nah den Ortsdeel Goldborn hin.

Dor gef dat fief lütje Anbuurnhööv mit je veer Keih. Im Sommer föhr Scheepers Vadder tweemal no‘n Goldborn hin, hol morns de Vullmelk aff un bröch Middags de Magermelk wedder trüge.

Düsse een Kilometer Weg wöhr nur Sandspoor un immer bargop no‘n Dörp to.

In Winter föhr de Melkföhrmann mit sin Gespann bloß Middags no‘n Goldborn, üm de Magermelk dor aftoloren, un nöhm gliektiedig de Abendmelk von‘n Vördag to de Vollmelk von‘n sülben Dag mit to sik na Hus.

In Schepers ehren Waterbasseng wören düsse vullen Melkkannen bit to‘n nächsten Morn köhlt.

De veerte Ortsdeel wör Lütjen Heins, wo Schepers Vadder noch Kannen uptoloden har.

In Winder, bi veel Sneiverweihungen, wör noch een drüttet Peerd von Nabers vör den Melkwagen mit anspannt.

De middelgrode, gummibereefte Melkwagen har an ne Längssieten keene Sietenbredder, blots een Kantholt wör up de Ladeflächen an de Sieten anbrocht, dat de Kannen nich rünner fallen künnen. Vörn up‘n Wagen wör en lütjet Kutscherhus vör twee Lüe, üm de Peer leiten to können.

Nadem Scheepers achtuntwintig Johr de Melk mit dat Peergespann na de Molkeree in Schappingel hinbrocht hebbt, wör Negenteihnhunnertfiefunföftig (1955) een lütjen Deutz-Trecker köfft, den se noch söbenteihn Johr to‘n Melkföhrn bruukt hebbt.

Aff Negenteihnhunnerttweeunsöbentig (1972) köm de Melktankwagen un hol de Melk aff.