An de Fauerstäh

Ick sitt gemütlich up Sofa, mine Tasse Koffie inne Hand. Dat Fernsehn löpp. Man ick kann de Sendung nich so richtig verfolgen. Dor innen Gorden löpp nen ganz aennern Film, un de is vull interessanter! Spannender as den besten Tatort-Krimi: An´t Vogelhüsken tobt dat Läben. Akteure bünt de Vögels.

Dor bünt de lüttken Meisen. Se wiest sück in ehre moisten Faeben; mojer künn man se nich maolen. As wenn se sück vör nen Schönheitswettbewerb taurechteamokt haen. Und dorbi bünt se ok noch de grötsten Akrobaten: Ut den steilsten Flug stürzt se sück mit grötster Geschwindigkeit sicher up den Fauerring un holt sück geschickt faste, üm de leckeren Körner ut den Ring tau picken. Flott stillt se ehren ersten Hunger. Boll gesellt sück annere Meisen dortau un deelt sück dat Fauer in Fräh mit ehre Artgenossen. Dat Rotkehlken sitt unnern Buschk un begnäugt sück dormit, unnen vanne Grund de Körner uptaupicken, de runnerfahlen bünt. De Amsel gesellt sück dortau un lett sück de Maohltied schmecken.- Äin friedlich Beld!

Man up äinmaol äin grotet Spektaokel: De groten schwatten Kraien stürzt sück frech in de Fauerstäh. Is ja wall klor, dat se Vörrechte haebt, se bünt ja schließlich de grötsten. Schworfällig verseukt se dann, sück an den Fauerring fastetauhollen. As de Blitz flüchtet de lüttken Singvögels innen Himmel. Gägen de groten Schwatten haebt se kine Chance. De Kraien quellt sück, Holt tau kriegen, man se bünt tau schwor un tau plump, un ok an dat Fauer in dat Fretkörfken kaomt se nich ran. So frech as se bünt, nähmt se de Meisenknödels komplett mit. Dorbi gönnt se sück ok gägensittig gornix. Ers as dat för ehr nix mehr tau haolen gif, gävt se up un fläigt weg.