Dünen in Snevern

Düsse Sandhümpel mit fienen Sand sünd in de gesamten Lümbörger Heid un ok annerswo to finnen. Ok Snevern hett siet ewigen Tieten Dünen, en dorvun is in Hansahlen up´n Theeshoff. Se fangt up de südwestlichen Siet bi den lütten Togang to´n Hoff an un treckt sik in nördliche Richtung üm dat Weeswark hin, se lööpt ut, wo de Smeed steiht, dicht bi´n Hauptingang. De grote Sandwall is to`n Glück keen Wannerdüün, sünnern towussen mit Fuhren un Ahornbööm. De Hoff mit sien Gebäuden is dodörch so richtig in de Schuul vör Winnen un Störm. Disse Dünenkeed treck sik bet an de Feldstraat rünner un lööp in´ n Sandstick ut.

An´ Hasenwinkel wussen ok Fuhren up de Sandbülten. In de sösstige un söventige Johren sünd hier un an´n Sandstick Hüüs boet un de Dünen sünd verschwunden. Vör gor nich so lange Johrn wöör en Düün an de Feldstraat. In Winter könen hier rodeln. Seit so bi fief Johr rüm steiht hier en neet Huus. Dörch den Boboom is de Sand verbrukt un de Rest even makt worrn. Männicheen hett den fienen Sand ok at Fogenmaterial för de Tegelsteen bi`n Huusboe nahmen. De Wätenschapen (Wissenschaften) hett faststellt, dat us Rebeet vun en Iestiet deckt wöör. Dat schall de „Weichsel- beziehungswise de Würm-Iestiet“ wesen sien un et wöör över teihn Grad köler at hüüt. Runne teihndusend Johr is dat her, to künn de Wind ut Nordwest Sand dörch de Lannen puusten.

Bi de Küll wüssen keen Bööm un keen Büsch. Wenn ik mi den Seekamp bekiek, kann ik mi dat goot vörstellen. Lütten Barg, de dörch den Wind afdragen warrt un den Sand in de Lunken afleggt. Goot, dat de Iestieten vörbi sünd un wi use Düün up`n Theeshoff bekieken un belopen künnt, mit Sönnen warrt dat aver nix.