Mobil – Fluch un Segen

Dat is ja woll een moje Saak, kann aber ok nervig wesen. Wichtige Saken kann man fix – ok över wiede Entfernungen – wiedergeben. Breven bruken kaum noch schreven worden.

Junge Lüü süch man vandaag mit Kopphörer un Smartphon dör de Straten lopen, dat man immer Nood hebben mutt, dat de sük an Laternenpahl de Kopp inhauen. Darum worden de ok de „Generation der geneigten Köpfe“ nöömt.

Man mutt aber nich up jede Meldung, de dat Smartphon levert, Antwoord geben. Wenn Harm up Trecker sitt un anpingelt word, holt he an un fummelt sien Handy ut de Taske. Sien Lisa fraag an: Wennher willt wi eten? Mit sien dicke smerige Fingers tippt Harm: Ik koom üm 12 Ühr, un packt sien Handy weer weg. He hett nett de Trecker weer ansmeten, dor segg dat all weer „Ping“ in sien Büx. Harm hollt weer an un süch, dat Lisa schrifft „OK“. Sükse Meldungen sünd nu ja würkelk nich nödig.

Herta weer in Stadt un froog bi Jonny an: „Hest du al bold Fierabend?“ „Nee“, schreev Jonny hör tö Antwoord; „Ik bün noch in´t Büro un koom later.“ He wüss ja nich, dat Herta achter hum stunn. Kiek, Unwohrheiten kann man dor ok mit van sük geven. Man mutt sük dor blot nich bi kriegen laten.

Dann giff dat ok Gruppen. Dor hebbt sük Lüü in versammelt, de Meldungen dörgeven, de alle Bedeligten weten sööln. Arbeidskollegen, Fründschaftscliquen, Geschwister, Vorstände, Nahbers, Chöre un Vereine. Wenn dor een Mitdeelung kummt, bruukt nich jeder antworten, denn dann pingelt dat ja in ener Tour. Wenn van de Lüü dann ok noch een Gebuursdag hett un alle de graleern, pingelt de Apparat allmanweg. Lääp word dat erst, wenn dat Gebuursdagskind jedes Mal „danke“ postet, dann is dat Maat vull un word för de annern nervig. Dann is am besten: Ton off!

Dat giff ja ok Smartphonbesitzer, de hebbt bi jeder Kontaktperson en anner Pingelmusik inspeichert. Dann weet he futt, well wat van hum will. Wenn Erich van sien Söhn een Naricht krigg, dann bleekt en Hund. Röpp sien Dochter an, röpt de Kuckuck. Bi sien Kolleeg erklingt de „Jägermarsch Nummer een“, bi sien Schwager brullt en Koh. Wenn sien Frau sük meld, zwitschert en Amsel un wenn en Aant schnattert, is dat sien Moder.

Ok moje Lieder kann man´n upladen. Wenn bi Anke dat Halleluja van Händel erklingt, weet se, dat Lottchen hör wat seggen will. Will Erich wat vertellen, klingt de Tatort-Melodie, bi Tommi hört se: „Ein guter Freund“. De Kontakt van hör Fründschaftsclub besing de Schlümpfe, van hör Fründin de Rosenheim-Cops, un wenn Dirk wat van hör will, heet dat: „Mama, es ist dein Sohn“.