De Vergantung

So´ne Vergantung wär immer lütjes Volksfest, dor har veel Spoß und irgendwat koofte man ok, um siene Sympathie vör denn affgebenen Buur to bekunden. De Aukschonator schnackte Platt und har Muulwark, dat jeder wat mitkreeg.

Morgens um 11 Uhr wär de Vergantung ansett, datt verköpen gung ober erst um 13 Uhr los. De Lüh mussen erst all richtig in Stimmung wähn, denn de Schluck und Beerstand wär natürlich ok dor. Ok muss man vorher in Ogenschien nehmen, wat alles verhökert wären schull.

Toerst dat Veeh: He stund achter de erste Koh und reep, wer butt dor wat för de junge Koh mit goode Abstammung? 900 Euro schreede een Köper, 1.000 Euro en anner, dat güng wieter bit 1.200 Euro. De Aukschonator hollde sein Handstock hoch und meende, komm Jan dor pack noch mol beeten to, so´ne Koh de geev soveel Mölk, dat Geld hest du in en Johr woller rut. So kem de Koh no 1400 Euro hen: To´n ersten – to´n tweeten, also 1.400 Euro to´n letzten und Glück dormit.

So gung dat wieter, eene Koh wär no´n Schnacken von Aukschonator noch beter als de andere. Ik hat mie de 7. Koh utkeeken und meende, dat ek de vor 1.400 Euro kregen kunn. Ober de Sprüche wurden immer mehr und so kem de Koh op 1.500 Euro. De Lüh wurden immer vergnügter, de Köh wurden bums verkooft, dann kem dat Jungvieh, wat ok gau neen Besitzer fund. At binnen alles verkooft wär, gung dat buten wieter, toerst de Anhänger, Ernte- und Ackergeräte, toletzt de Trecker. Jo, op denn harn de Lüh sik all spitzt. Fast neen Trecker seggt de Aukschonator (wär ober all tein Johr olt) loop at denn Düvel, best in Farf. Wer butt dor wat vör? Dat erste Gebot leg bi 10.000 Euro. Nee, meente de Aukschonator, dorvör kannst en bekieken. Dann lett he denn Trecker noch mol lopen und meende, mojen Klang und lop at een Uhrwark. Dat nächste Gebot leg bi 15.000 vör 22.000 Euro ist he dann verkooft wurden. Toletzt kem dat lüttje Beschlag. De Lüh de noch nichts kooft harn und wullen ok gern op de Köperlist stohn – manch een het wat mitkregen, wat he nicht gebruken kunn. Nu kreg he mie woller to sehn und reep: „Jürgen du muss diene Koh jo intünen – und bums har ik 30 Pohls för 80 Euro, neehe wären billiger wehn, ober dat gehört dor enfach mit to.

So gung de Verkantung to enn. De Aukschonator wär heeser, Sweet leb em ut Gesicht, ober he freude sick, dat he als verkloppt har. Wie hebt all veel Spoß hart und veel belevt, manch een ist totol besopen no Huus goon. Leider giv dat vondogen soke Verkantung nicht mehr. Vondogen sind de Betriebe so grod wurden und wenn en Hoof obhören deiht, kann man dat lebendige und dode Inventor nicht mehr eenzeln verhökern, sondern de ganze Beschlag wart tohoop verkooft.