Tante Adele fehlt nix

Nu ober to use lüttje Geschicht: Jörg is bi sine Tante Adele to Besök. Adele is nämlich 88 Johre olt wurn un dat hett se leste Wäke mit ehre Damen von´nen Häkelclub fiert. Önnig mit Kaffeetafel un achterran Kirschlikör, dat is lustig wäden. Jaha, wenn ole Froen ok nich mehr väl künnt, aver fiern un lachen künnt se noch goot! Ok, wenn se mannigmoll all bäten tüdelig sünd.

Wer keene olen Lüe kennt, verzichtet bekanntlich up ´ne Menge Spoß. Adele hett keene Angst vör dat Öller. Se meent, dat Öller verschreckt bloß Froen, de uter eene Modelfigur ans nix uptowiesen hebbt. Adele weet ok, dat dat Minschen givt, de ehr gern moll up den Puckel kloppt, aver de versökt bloß, ehr dat Krüz to bräken.

Dorüm seggt se sik: ,,Leeber bäten flott un glücklich as goot gestylt un langwielig leben.“ Jörg sitt inne Stuuv un kikt sik üm. Alles is so as jümmer bi Tante Adele: de gemütlichen Sessel sünd mit Häkeldecken belegt, de lange Anrichte ok, un den gedeckten Kaffeedisch ziert sülmstverständlich eene altrosa Häkeldecke. De bunten Sammeltassen passt goot dorto un innen sülbernen Kerzenleuchter flackert heimelig dree Lichter.