Wäsche buten drögen

Eenfacher kannst du keenen Strom sporn! Un wenn de Storm denn önnich bruust, denn is diene Wäsche achteran so wat von weik un glatt, dat du keenen Weikspeuler un keen Plättiesen brukst! So kannst du Energie un Tiet un Geld sporn, un hest echten „Freuhjohrsduft“ von diene Bööm un Blaumen in de Wäsche!

In dat „fortschrittliche“ Amerika wöör dat lange Tiet gor nich geern seihn, de Wäsche buten tau drögen. Besonners bi de Rieken wöör oder is dat meist sogor verboorn: Mit de Wäschelinjen buten schall dat nich utseihn „as bi arme Lüüe“ un womöchlich Kööper oder Mieter affschrecken. Oder woll man eenfach nich de Ünnerböxen von sienen Naaber vör de Nääs bummeln hebben??

De Amerikaner besinnt sick aber nu in eenige Staaten (so as in Kalifornien) dorup, dat se doch bannich vääl Sünn un Wind hebbt in ehr Land. Un se drööcht ehre Wäsche wedder buten. Dat gifft sogor de „Right-to-dry“-Bewägung, de meent, dat keener jüm dat „Buten-Wäsche Drögen“ verbeien kann.

In Italien, Spanien oder Griechenland, wo de Wäsche baben twischen de Hüüsreegen bummelt un drööcht, dor finndt de Touristen dat wunnerbor un originell. Un se kööpt Postkorten dorvon, weil dat benah as „Kunst“ utsütt un se jümmer Urlaubsgefeuhle kriecht, wenn se naher de Postkorten bekiekt!

Denn is dat bi mi woll ok „Kunst“, wenn ick de Wäsche von de ganze Familje up lange Linjen in‘ Goorn drööch?? Ick hebb gor keene Wäschedrööchmaschien un bün öbertüücht dorvon, dat dat wunnerbor ahne geiht!

Ok hier bi us in Norddüütschland, wo dat mehr rägent as in Kalifornien oder Südeuropa, kannst du Wäsche buten drögen – sogor dat ganze Johr öber. Vör allen hier bi us up´n Lann! Is dat drööch buten, denn hängst du de Wäsche in dienen Goorn. Is dat feucht oder dat rägent, denn bummelst du se ünnern Schuer, Ünnerstand, Vördack, in´ Wintergoorn oder up´n Dackbodden up. Oder du stellst denn Wäschestänner ok mal vör dienen Aben, denn is de Luft glieks vääl bäter un nich so drööch.

Is doch vääl eenfacher, wenn du glieks de Sünn un denn Wind un de Wärme nutzt för diene Wäsche anstatt dat eerst dat groode Windrad oder de Photovoltaikanlaach de Energie „infangt“ un in Strom ümwannelt, denn du denn wedder för diene Wäschedrööchmaschien köpen musst, oder??