Wichtig Linnenbööm

Dat let för mi bold so, as wenn dor een grood Immen-Volksfest aflopen deit. Wenn ick´t verglieken schall, denn is dat dor in de Boom kien Kraamermarkt, dat is eher een Münchener Oktoberfest. Ick hoop bloß, dat se bi so een grood Angebood noch ganz veel sünnig Daag hebbt, üm sick all dat to besörgen, wat se för sick un de Naakaamen so good gebruken könt un dormit ok wi Minschen dör de fliedig Immenarbeid in veel Millionen Blöiten dorvan profiteern könt.

In mien Tuun har´k disse lütten Fleger all vermisst, aaber as ick vör´n poor Daag mit mien Rad an de grood Linnenboom vörbifohrn bün, wär mi´t kloor, worüm se sick dit Bloitenmeer dor in de Linnenboom utsöcht hebbt. Dor gev´t Nektar satt! Vör Johrn hebb´k mitkregen, dat nich wied dorvan af een noch veel öllern, gröttern un gesunnen Linnenboom, de wegen sien Blö un Schattenschmieten een Doodsurdeel kreeg. Dat wär de Linnenboom, de all 1914 to mien Moders Schooltieden för de Kinner een Schaddenstee af-geven hätt. Twee grood Kranen hebbt Tack för Tack, de sülvst all de Gröttd van een Boom harn, naa´t Afsaagen de övergrood Futterweid för Immen to d´ Boom rutstemmt. Up Grund legen veel dick Holtstücken för ´t Heizen, wor de Unkösten van´t Afsaagen villicht mit afdeckt worden sünd. Aaber denn wär dat Leven van un in dissen Linnenboom utlöscht.

Een ganz Rieg van Naavers kregen dat to laat mit un wärn düchdig vergrellt, dat se nich dorgegen angaahn kunnen, dat de Suerstoff-, Nektar- un Schaddenboom eenfach so an´t Siet maakt worden is. Een Fro ut de Naaverschkop hätt vergrellt dat Leed „Mein Freund der Baum“ up de Snackdraaht van dissen egensüchtigen Naaver speeln laaten. Aaber so as man kien afschaaten Kugel torüggholen kann, so kann ´n ok sülvst een ollen wertvullen Boom in sien gesunnen Tostand nich wer an de sülvig Stee setten. Dor brukt ´n an Tied mehr as een lang Minschenleven!